政壇：林村客家宴安排亂龍
劉皇發（左二）話客家菜中佢最鍾意食釀涼瓜。
香港客屬總會尋日喺大埔林村舉辦客家美食嘉年華，本來預計有二千五百人齊食客家菜，可惜天公不作美，活動開始前突然遇上黃色暴雨警告，大雨之下搞到最後遲咗成個鐘先開始，有參加者更加因等得耐唔舒服要叫白車到場添。唔知大雨係咪打亂埋大會嘅計劃，工作人員除咗將國旗、區旗掉轉嚟掛，仲因為溝通混亂而令原先擔任主禮嘉賓嘅特首CY梁振英缺席活動。
劉皇發（左二）話客家菜中佢最鍾意食釀涼瓜。
會場內嘅區旗國旗掉轉掛。
據特首辦所講，原先CY都諗住冒雨出席，但大會初時決定腰斬活動，仲叫去緊林村嘅CY折返。CY無到，但好多人都到咗，包括前全國人大常委曾憲梓，佢坐輪椅到場支持今次活動搞手、佢嘅公子曾智明，佢呼籲客家人堅定愛國之餘，仲帶領台下眾人一齊高唱《沒有共產黨就沒有新中國》。
大會尋日特地準備幾款地道客家菜，邀請台上嘉賓試味，發叔劉皇發望勻枱上幾款客家菜後，就話自己最鍾意食釀涼瓜。提起「涼」字特別敏感，發叔咁多味客家菜唔揀係要揀釀涼瓜，有無特別意思相信只有發叔本人先知嘞！
