(左起)高永文、黃家和同曾鈺成穿起圍裙出席金茶王啟動禮,大談歎奶茶心得。

食物及衞生局局長高永文尋日出席金茶王啟動禮2013,大談歎奶茶心得。高永文話識沖茶但係沖極都沖唔出港式奶茶,因為沖得好嘅港式奶茶澀而不苦,仲可以入埋非物質文化遺產候選名單,象徵香港人一做就要做到最好嘅精神。

(左起)高永文、黃家和同曾鈺成穿起圍裙出席金茶王啟動禮,大談歎奶茶心得。

咁奶茶應該配食咩呢?同場嘅咖啡紅茶協會主席黃家和話應該配菠蘿油,高永文就話太太鍾意奶茶配奶油多,立法會主席曾鈺成就覺得奶茶最啱配蛋撻,可惜立法會只係得梳打餅。不過,原來曾鈺成平時唔多飲奶茶,最鍾意飲齋啡,佢又抽水話下次有議員再拉布,不如搵人拉吓奶茶慰勞同事。

對於有議員話要拉布阻止財委會撥款,擴建屯門同打鼓嶺堆填區,曾鈺成覺得拉布係消極方法,市民唔會同意妨礙議會工作嘅行為,而且立法會有議事規則規管,唔擔心議會畀少數派騎劫。佢又話雖然比例代表制令議會難達成共識,但係現時合適嘅制度,若果將來實行普選,就由市民同議會決定係咪改制。

第一手消息請下載on.cc東方互動iPhone/iPad/Android/Windows Phone Apps