政壇：鬍鬚曾無嘢叻但襟撈

鬍鬚曾前日去完「創意香港」嘅動漫啟航禮，尋日喺網誌回味一下過去迷漫畫嘅日子。喺美國長大嘅佢話，當年漫畫幾乎係所有美國男仔嘅精神食糧，而佢就每星期儲錢買漫畫。佢又話鍾意嘅漫畫人物較冷門，就係神奇四俠入面嘅銀魔（Silver Surfer），到依家佢仍然保存一九六八年嘅創刊號漫畫，仲講笑咁話即使好友相借佢都未必會借。

續做財爺 市民激奀

雖然銀魔冇乜犀利武器，但鬍鬚曾話呢個亦正亦邪嘅獨行俠角色有複雜嘅內心戲，一度想侵略地球，後來又出手保衞地球，是一個悲劇人物，不禁令人以為鬍鬚曾講緊自己，事關政務官出身嘅佢同樣係周身無刀，無專長，最叻都要數到年年估錯數。佢又話雖然銀魔唔係大紅大紫，但面世半個世紀，近年都仲有漫畫電影等新產品推出，可見一個漫畫人物只要夠深入民心就得。

漫畫人物如是，政界人物亦然，但鬍鬚曾「深入民心」嘅可能離唔開估錯數仍愈做愈興奮，市民見到庫房水浸仍未能受惠，直情激到入心。與其話畀人鬧爆嘅鬍鬚曾係悲劇人物，咁有佢做財爺，先係市民嘅悲劇呀！

佢話作為漫畫迷，重提前幾年推出諮詢預算案嘅漫畫，但佢冇講到結果又係被鬧爆嘥公帑收場喎！跟住佢又話，六十年代Marvel旗下復仇者聯盟氣勢不及另一漫畫公司DC旗下嘅正義聯盟，估唔到半個世紀之後，復仇者聯盟終於成功「復仇」，在全球掀起熱潮。今年預算案，鬍鬚曾宣布迪士尼樂園將落實興建首個Marvel「漫威」漫畫主題園區，咁啱銀魔都係來自Marvel，原來Marvel復仇大計，鬍鬚曾都有參與。