Sun奇古怪：Sun潮語：入谷
聖經之中有一章叫《出谷紀》，內容係講摩西點樣帶以色列人離開埃及，去到被許之地，中間情節相當精彩，並已拍成多套電影。講開埃及，最近埃及政局動盪，人民上街示威反對總統穆爾西管治，最後演變成暴動。搞咗幾日，最後埃及軍方介入，推翻穆爾西及其所屬政黨穆斯林兄弟會，並成立咗過渡軍政府，遲啲舉行大選。埃及人三扒兩撥就變天，自己行出深谷，難為香港人三號風球，狂風大雨照上街頭，都唔能夠郁到呢個爛到不堪嘅政府半條頭髮，唔通真係要搵個摩西帶我哋「出谷」？好似啲風球咁，愈吹愈遠……其實今日想同大家講嘅潮語同埃及無關，只係同「谷」有關。
Sun潮語：入谷
潮語「入谷」，同聖經嘅「出谷」係無關係嘅，亦唔需人帶領。「入谷」其實都係譯音類潮語，所講嘅「谷」，其實即係英文嘅Group。呢啲Group通常係指Facebook內嘅群組。呢啲群組真係乜嘢主題都有，隨便撳幾個掣，邀請啲Facebook朋友入就得。開呢啲群組通常係用嚟畀大家就住某啲議題，聚集志同道合者發表意見。又或者係一啲組織，希望有個群組，可以畀啲會員喺網上互通消息，互相吹水一番。「入谷」網上吹水，已經成為好多人生活嘅一部分。有啲仲非常沉迷，直情好似住喺個「谷」度，日日對住部電腦，做鍵盤戰士，不知人間何世。喺某啲有港獨色彩嘅「谷」，甚至可以吹到飛機大炮，勇武革命，唔知以為自己係辛亥革命嘅黃興，日日用鍵盤打仗搞革命。不過呢類行為，似係打飛機多啲……
但係又唔好睇小呢啲「入谷」嘅人同呢啲虛擬群組，上年反國教咁大場運動，開始時都係黃之鋒喺Facebook，開咗個「學民思潮」群組而凝聚到力量。國民教育家長關注組，都係由一個Facebook「谷」開始。有見及此，啲維穩力量都搞咗啲咩「愛港力」、「愛港之聲」去抗衡，不過「入谷」嘅係啲咩人？大家心照啦！見到呢啲垃圾「谷」……真係谷氣個「谷」！
