政壇：霍啟山潔膚不忘靚媽咪
啟山挽住一袋護膚品離開。
港協暨奧委會會長霍震霆嘅二公子霍啟山係城中型男，日前下晝三點半鐘，啟山現身中環置地廣場地庫一間美國品牌護膚品專門店，西裝骨骨嘅佢喺護膚品專門店內四處望，好快就搵到男士護理產品嘅貨架，仲毫不遲疑咁攞咗一支全效潔面啫喱，揀揀吓，佢仲買咗啲其他護膚品，原來佢自己扮靚外，仲掛住靚靚媽咪朱玲玲。
啟山挽住一袋護膚品離開。
啟山入咗舖頭後，好爽快咁揀咗潔面啫喱，似乎對有關產品唔陌生，甚至係回頭客添。據佢揀嘅潔面產品標示聲稱，唔單止可以清理皮膚角質，而且能夠控制面部油脂及保濕，好適合炎夏使用。
啟山揀好後，就走近收銀櫃台準備付款，呢個時候，佢注意到附近陳列嘅卸妝水同潔面乳等護膚品，遂向店員請教一系列產品嘅功效同使用方法，而店員亦好殷勤咁同佢講解。過咗五分鐘後，啟山就決定買多幾件護膚產品。起初以為佢買護膚品送畀女友，但啟山話啲護膚品主要係送畀媽咪喎。
