政壇：「小明醫生」唱到東莞
李家仁明日會到東莞東城區舉行演唱會。
醫而優則唱、有「小明」外號嘅兒科醫生李家仁憑一首《小明上廣州》，唱到街知巷聞，聽日佢更會衝出香港，到東莞東城區舉行迷你演唱會添！身兼香港東莞東城同鄉會會長嘅李家仁話，預料聽日嘅演唱會有四百至六百人出席，呢個演唱會雖然唔算大型，但作為表演者嘅佢亦只係準備咗三日。唔通因為日前佢診所爆消防喉，搞到唔夠時間去準備？
李家仁明日會到東莞東城區舉行演唱會。
據聞李家仁呢個衝出香港嘅演唱會，歷時一個多小時，佢將會獻唱大約十首歌左右。當問到係咪為第時喺香港紅磡體育館、伊利沙伯體育館等地方舉行演唱會鋪路時，李家仁就大賣關子，話一切留待經理人去決定喎。李家仁嘅「小明系列」歌曲固然深入民心，但係要開演唱會最緊要係儲足歌曲，唔知會唔會激發佢加緊創作歌曲，為香港開show做好前期準備呢？
