政壇：四大商會變招抗標準工時
勞工界熱議標準工時，圍繞呢個議題嘅僱傭新一輪角力亦拉開序幕，一早表態反對立法嘅四大商會為免一味反對失民心，已聯同僱主聯合會進行一場大型調查，期望將超時冇補水嘅行業摷晒出嚟，然後搵相關業界商會以自律方式解決。尋日正式上任嘅工業總會主席劉展灝（Stanley）透露，今次參加調查嘅商會包括工總、中華總商會、香港總商會及中華廠商聯合會在內嘅四大商會，再加埋僱主聯合會，覆蓋面有一定代表性，佢哋已開過一、兩次會議，下一步就係搵中介機構做調查。
Stanley話，全港二百八十一萬打工仔之中，有六十幾萬人需要加班，當中三十二萬人冇獲補水，包括企業管理層、專業人士，佢哋希望撇除呢班人，再深入研究邊啲行業嘅員工未獲超時補水。佢話，冇理由因為少數業界冇補水，而連累工商界被迫接受全面立法，何況一般寫字樓員工如果遲到早退、飲下午茶、工作時間用手機上網，咁係咪仲要計算超時補水呢？
不過，靠業界良心發現、自動補足加班費畀員工，如果真係可行，點會有家吓香港人工時過長嘅問題啊？
