政壇：長毛玩拉布 鄧國威腳軟

預提幾萬項動議

拉布老手長毛話，當局推銷堆填區方案時，只識游說議員支持擴建撥款，無交代源頭減廢具體細節，反對撥款嘅佢話，到時會提出幾萬項拉布式動議，令到撥款冇辦法喺立法會暑假休會前通過，按照會期，立法會好快就會開始放暑假，如果長毛又嚟一次拉布，公務員加薪方案涉及嘅撥款就好難喺暑假前通過。

行會成員兼新民黨主席葉劉淑儀尋日就呼籲長毛放棄拉布，葉太話，雖然公務員加薪係以追溯方式落實，財會押後批准只會令公務員較遲取得由今年四月起計算的加薪金額，不會因而少收薪金，但「基層公務員都想盡快攞番一百幾十」，部分資助機構如醫管局等，亦會因拉布而受影響。

依家大部分泛民議員都表態話唔支持拉布，至於兩個堆填區撥款仍然有爭議，手握關鍵四票嘅工黨亦未定最終投票立場，重申要政府成立二十億元環保回收基金。公專聯則話，市民對當局的減廢路線圖缺乏信心，下個禮拜佢哋會同環境局副局長陸恭蕙午膳，若得不到滿意答覆，不排除喺財會改投反對票。