發展東北惹爭議 跛腳政府寸步難

新界東北發展計劃第三階段諮詢屆滿，港府尋日推出修訂方案，決定先發展古洞北同粉嶺北兩區，預計可發展土地有三百幾公頃，提供住宅單位六萬個，容納人口十七萬人，開發成本一千二百億元，預計新市鎮最快二○二三年落成。至於坪輋及打鼓嶺發展區，以未有完善交通配套為由暫時擱置。

嗱嗱嗱，都話一波三折o架啦，唔止發展坪輋及打鼓嶺打退堂鼓，連發展古洞北同粉嶺北嘅模式亦唔同咗，由原本政府收地發展改為公私營合作，話擔心強行收地會觸發訴訟，拖慢發展進度喎。難為發展局局長陳茂波仲死撐，話新界東北發展區係「加強版傳統新市鎮」喎。

唉，官老爺仲有心情搞爛gag，新界東北發展區係咪加強版傳統新市鎮仲有待時間證明，目前可以肯定嘅係，呢個計劃根本係加強版政治炸彈就真。港府被指割地賣港打造「深港富豪雙非城」而成為眾矢之的，家陣仲多一個官商勾結嘅嫌疑，唔淪為全城箭靶至奇啦！

太一叮真係唔明，港產官僚無能啫，唔通個個都無記性？上年公布計劃時至話公私合營畀人官商勾結觀感，所以決定改以傳統模式收地，家陣一句擔心訴訟風險，就打倒昨日的我，有冇兒戲啲呀？有冇難睇啲呀？係人都知，經過前特首曾蔭權爵士嘅發揚光大之後，官商勾結已經令人深惡痛絕，咁搞法，發展新界東北點可能唔阻力重重吖？

話時話，喺廢官主理之下，發展新市鎮搞到好似擴建堆填區咁，又係地區三減一，又係觸發居民強烈抗議，又係用埋啲垃圾招數，真係搞笑。嗱，關注團體表明不接受賠償方案，對發展計劃寸土不讓，話唔定港府呢個闢地建屋大計最終又被人送去堆填區o架。

所以話啫，樓宇供應長期短缺，大量市民淪為無殼蝸牛，最關鍵嘅問題唔係香港無地，而係港府無能。填海拓地波折重重，見縫插針畀居民群起怒插，家陣發展新界東北計劃又隨時敗北而回，香港人想安居樂業簡直係遙不可及嘅夢想。

發展東北惹爭議，跛腳政府寸步難。現屆政府不斷「呼天搶地」，結果一事無成，可以講係上不着天，下不着地，如果今次又跪低，港產官僚睇怕都無地自容咯，叮！