政壇：搞搞政：網民寸爆建仔微電影
建仔近日有樣學樣推出首套微電影《低頭》，話就話叫微電影，但就拍到好似啲新聞檔案節目咁，加上微電影係針對一眾經常低頭用手機或長時間上網嘅年輕網民，條片只係出街兩日，即有數以千計負評，且被網民留言鬧爆，有網民更揶揄該黨經常就政治民生議題轉軚。
有網民話呢套微電影命名相當符合該黨黨性，建議佢哋不如開拍「出賣」、「低頭」、「跪低」三部曲，前傳「出賣」內容可以係該黨過往「打倒昨日的我」嘅優良傳統，仲可以跨黨派搵埋白鴿黨硬骨頭來客串擔綱演出喎。不過，有網民就話，該黨開拓網絡市場事有蹺蹊，質疑係咪想抹黑醜化網民，最終達成維穩大業。網民咁大反應，睇嚟黨主席譚耀宗都預料唔到。
該黨仲搞咗個調查，發現逾六成年輕人每日平均用超過兩小時上網，仲有近四分一受訪者經常一邊食飯一邊「篤機」。不過，睇番調查結果，因為上網影響健康同社交嘅年輕人少之又少，逾半受訪者都表示未因上網影響健康，亦無影響同家人關係，另外因為上網而唔應約嘅受訪者只有百分之八，相反就有八成定力強勁，話未試過因打機缺席聚會。該黨咁樣「先天下之憂而憂」，唔怪得被咁多年輕網民鬧爆喇！
