政壇：CY開餐食河粉無有怕
梁振英（右起）、蘇澤光、劉炳章喺政總餐廳食晏。
身兼經濟發展委員會主席嘅特首CY梁振英尋日開會後見記者，臨走前有記者問佢可唔可以「開誠布公」交代下名下公司資產成立信託進度，但佢一個轉身唔係要答問題，而係想問財爺鬍鬚曾係咪「又」去政總食飯，好可惜尋日鬍鬚曾咁啱帶咗住家飯，陪唔到佢，而好多委員開會後都急急腳走人，結果CY同經發會成員蘇澤光同劉炳章三個人喺政總餐廳開餐。
梁振英（右起）、蘇澤光、劉炳章喺政總餐廳食晏。
雖然今次食飯人少少，但無損CY雅興，撞到記者朋友後仲叫記者要等埋食物上枱先好同佢影相喎！見到CY食牛腩粉，於是就講笑問佢怕唔怕毒米粉，但佢就一於食粉無有怕，梗係啦，因為佢嗰碗係河粉，唔係米粉。講到呢度，CY身邊G4隨從亦相繼埋位護主，但CY就意猶未盡咁喺G4身後鑽出個頭來，笑騎騎同咁講咗一句:「你有無入廚房o架？」
