每逢七一都係泛民政黨嘅「吸金」良機，其中社民連成績都算幾好，只靠「長毛」梁國雄一人嘅魅力，無賣書無賣衫又無賣紀念品，都籌到六十九萬，多過去年七成幾。呢舊錢對長期五行欠水嘅社民連嚟講，可以話係救命錢。不過，聽聞長毛仲有兩單官司未找數，隨時要幾百萬埋單，如果長毛「被破產」，咁社民連隨時亡黨都似。

若長毛破產 即時散檔

長毛有兩單司法覆核都輸咗，分別係指梁振英參選特首時發虛假聲明，同舊年挑戰立法會主席曾鈺成剪布單案。法官最後判長毛要畀對方訟費，唯一慶幸係梁振英同曾鈺成都未向佢發出「帳單」，但社民連副主席吳文遠話，如果對方真係追數，每單案最少百幾萬，加埋「阿牛」曾健成單美孚屏風樓官司，夾埋差唔多要四百萬埋單，如果社民連籌旗失敗，長毛一破產就無得做議員，咁社民連亦會隨之夠鐘拜拜。

所以吳文遠話今個暑假係佢哋「存亡之夏」，一定要全力撲水畀長毛同阿牛，如果唔係只會攬住一齊死。點知佢尋日喺社交網站話，七一當日好多社民連支持者向佢講唔好意思，因為嫌自己捐得少，吳文遠話市民舉下手指公，佢都好開心喎。咁究竟佢想市民捐錢定舉手指公定係兩樣都要晒先？

其實今年社民連籌款額大幅上升，都同人民力量內部分裂不無關係，有社民連中人分析，自從黃毓民出走人力後，都感覺到有部分人力支持者「回流」撐長毛，令社民連支持率升番唔少。至於同毓民有無機會復合呢？聽聞社民連中人覺得同毓民保持距離好啲，以免相嗌唔好口喎！

第一手消息請下載on.cc東方互動iPhone/iPad/Android/Windows Phone Apps