商品失實應受罰 港府失信該何罪
營商之道嘅成功秘訣係「誠實」，生意買賣嘅金漆招牌叫「信用」，如果唔係，香港都唔使大鑼大鼓宣傳自己係「正貨之都」啦。之不過咁，宣傳還宣傳，事實歸事實，事實係香港正貨之都塊招牌其實逐漸褪色，不良商人信口雌黃童叟齊欺嘅歪風盛行，所以咯喎，規管條例就應運而生嘞。
呢條港式打假刑法叫《2012年商品說明（不良營商手法）（修訂）條例》，本月十九日生效，以後唔止商品虛假陳述係違法，兜售服務誇張失實一樣有罪。講個極端例子吖，如果再有茅山師傅以上床可以改運嘅失實聲明誘騙少女失身，就算最終無人上釣，都隨時被人告到甩褲(o架)。
當然，新例嘅最大受益人唔係奮不顧身醉心改運嘅無知少女，而係希望憑書本改寫命運嘅莘莘學子，畢竟假貨茅山天師唔多，但係A貨補習天王周街都係。嗱，消委會係咁講嘅，現時私營補習社慣用嘅宣傳字眼好似「最多學生奪5**」、「連續十年貼中」、「最多學生報讀的英文科導師」等等，都已經構成取巧及誤導之嫌，如果未能提供足夠數據支持，分分鐘可被檢控。
即係咁，規管補習社老作成績欺騙學生，太一叮舉腳贊成(o架)，你估家陣文憑試考作文「我的幻想世界」呀，可以信口雌黃作得就作。呢個自詡「全港最多學生導師」、嗰個自稱「全港最紅天王」，呢個又話自己「全港收生最多」，咁即係一定有人吹水唔抹嘴，舢舨充炮艇啦，營商唔老實已經係欺詐，為人師表滿口謊言更加罪加一等！
之不過咁，講到欺詐咯喎，大家難免要問一句梁振英政府，如果補習社信口雌黃要被檢控，咁你哋言而無實失信於民又該當何罪呀？現屆政府不斷自吹自擂，又話「穩中求變適度有為」，又話「改革創新務實為民」，唔該提供充足證據支持，如果攞唔出嚟，咪即係吹水唔抹嘴，存心欺詐囉！
叮佢個鎯鎯，不良商人為咗賺鈔票而宣傳失實，不良政客為咗選票一樣滿口謊言，競選時吹到天下無敵，點知當權後就無心無力，搞到房屋、醫療、環保、教育亂上加亂，衰上加衰。一個失信於民嘅大話精政府，何止要被檢控，直頭要除牌啦！係喎，大話精政府公然取巧及誤導嘅例子多不勝數，其中焚化爐唔建又建就係例子，唔知受騙市民會唔會將佢哋告到甩褲呢？
不如咁啦，訂立一條《2012年商品說明（不良從政手法）（修訂）條例》，政府失信於民就自動除牌，無謂次次搞成幾十萬人上街至腳痛落台咁難睇吖，叮！
