City Snapshot：大輝亂噏撤七一假
大輝話最好取消七一假期，即時被莫乃光回敬。
每年七一上街嘅人都好多，有人話七一遊行係風土病，有人話係節目，遊行人數反映市民畀政府嘅分數。
大輝話最好取消七一假期，即時被莫乃光回敬。
立法會尋日辯論政府應正視七一遊行訴求，廠商會議員林大輝話梁振英唔應該再花言巧語，要用政績話畀香港人聽，佢有能力挽回民心。講講下，佢就話香港雖然有言論自由，但七一成為市民控訴大會，呢個現象好可悲。咁大輝有乜解決良方？佢竟然話最好取消七一假期，講到好似無七一香港就無怨氣一樣。
好彩資訊科技界議員莫乃光即時回敬大輝，話就算取消七一假期，市民都會揀十月一日上街，如果連十一都取消，咪元旦日遊行囉，點阻止到香港人呢？
