吳若蘭終於蒲頭出席活動,硬銷英國商貿優勢。

英國駐港總領事吳若蘭(Caroline Wilson)上個月畀家鄉嘅傳媒揭發,以月租七十二萬元入住司徒拔道超級豪宅Opus後,一直潛水唔見影。尋日佢終於蒲頭,出席香港總商會嘅午餐會硬銷英國商貿優勢,仲同台上台下嘅老外朋友有傾有講,有問必答,盡顯外交家功架。但話口未完,佢喺午餐會結束後即飛步去撳升降機想鬆人,對香港傳媒有關斯諾登或佢入住豪宅等提問一律借咗「聾耳陳隻耳」當聽唔到。可惜架升降機等極都未到,畀記者逼到埋牆角嘅佢終於回應咗一句「唔係適當時候接受訪問」,就喺眾人護送下入升降機。

吳若蘭終於蒲頭出席活動,硬銷英國商貿優勢。

第一手消息請下載on.cc東方互動iPhone/iPad/Android/Windows Phone Apps