次世代生活圈：分享靚早餐

「早餐係每日嘅第一餐，對我哋嘅身體好重要，但唔係個個人都食，就算食都未必會重視食啲乜嘢。」有研究指早餐應該吃得像皇帝，港人卻偏偏吃得像乞丐，求其吃兩啖就當早餐。Kitty 亦曾是其中一位，然而三年前的一個決定，改變了她吃早餐的態度，「當時我想搞個影相project，就諗吓有乜嘢係每日都會做，答案就係食早餐。」

每天上載一張早餐照其實唔難，但早餐來來去去都是那幾款，怎樣才能拍出新意來？「頭幾日影嘅早餐都好普通，於是開始諗點先可以影得靚啲。」她開始在網上尋找各類早餐食譜，才驚訝發現早餐世界原來這樣大，而要製作一份精美早餐原來也不太費時。

早餐是快樂良方

雞蛋、麵包、早餐穀物、水果、乳酪、熱香餅，統統都成了Kitty 的早餐「元素」，豐富了味覺與視覺之餘，亦改變了她的挑食壞習慣，「我以前唔食番茄同士多啤梨，依家就成日用佢哋嚟整早餐。」 她不諱言，除了色香味外，也十分着重均衡營養，她會留意食物的原產地與營養價值，讓自己吃得健康一點。

「每日除咗洗面刷牙，第一件事就係食早餐，食得好，個人都開心啲。」原來食早餐不止為身體健康，更是快樂良方。Kitty 笑着說，每天早上花十分鐘，製作出簡單卻又色彩繽紛的早餐，既填飽肚子，生活亦因此填上顏色。

Kitty 的影早餐計劃依然持續，每月更自設主題，配合五彩的桌布與餐具，構成一幅幅賞心悅目的相片，獲得不少網民讚好，「分享咁多早餐相，都係想話畀大家聽，早餐真係好重要。」每個清晨的她，不會忘記為自己準備早餐，以笑臉迎接新一天。