有半點家教者,皆知曉「有錯要改」的小道理,同時,「知錯」就要認,咁先至啱數嘛!知錯能改,善莫大焉呀!

但係,上星期三消防處九唔搭八的藉詞話接獲投訴而殺入東方報業中心「調查」,卻無發現任何不妥之處,至今日足一周矣!仍未有合理解釋,及還東方報業集團一個公道,此乃係官僚歪風所致吖?定係當東方報業集團如無物呢?甚或因背後有不可告人之秘密?有人濫權?有人包庇?定係借故打壓新聞自由?針對迫害正義傳媒呢?

家陣,引起立法會議員關注,並去信立法會保安事務委員會,批評消防處「做法極不透明、有欠程序公義、有濫權之嫌」了!希望香港廢柴政府不要再拖一星期才回應,應盡快作公開交代好喎!但千祈勿再說甚麼「接獲電郵投訴」呢啲咁反智嘅理由囉!因為……

哦!若只無厘頭咁收到個電郵,諗都唔諗咁就撲去郁人,同蠱惑仔聽到吹雞,即擸架生做嘢,有乜分別?

好吖!如收到投訴就「履行職務」咁乖,咁我在此公開投訴囉:政府呢頭話監管大廈外牆招牌,嗰頭,奶路臣街同西洋菜街交界最近突然起咗個鬼死咁大,有六層樓高、半條街長嘅三角大招牌,整喺層舊樓外牆度,凸晒出嚟,好鬼牙煙,隨時有跌落街的危機,究竟邊個批准在那處起個咁大招牌嘅呢?誰個部門要負責?

仲有,《基本法》話明香港回歸後有普選嘅,至今十六年過去,普選個影都見唔到,是誰偷了我們的普選權呢?喂!我又應向誰投訴?

我仲有大把投訴資料,要唔要吖?廢柴香港政府……

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps