政壇：搞搞政：唔得掂死撐中史受歡迎
設計圖片及對白
要認識自己國家就唔少得讀國家嘅歷史。有議員尋日喺立法會提出質詢，話近年唔少中學都取消以獨立科目教中史，以致修讀中史科嘅高中學生人數近年持續下降。今年香港中學文憑試中史科考試嘅報考人數只有七千四百幾人，比舊年銳減超過一千人，仲問當局會唔會重新考慮要求中學喺初中階段須設立獨立同必修嘅中史科。
設計圖片及對白
對於修讀人數持續減少，吳克儉似乎視若無睹。佢話除咗必修科外，不論係以前嘅高級程度會考定依家嘅中學文憑試，中史科都喺最受歡迎科目中排行第八位，仍然係好受歡迎嘅科目。對於議員嘅質疑，吳克儉仲不斷死撐，話近年學生人數減少，加上轉學制後學生需選修嘅科目亦冇咁多，所以報考人數先下降喎！而其實根據政府數字，自新高中課程推行四年以嚟，報考中史科嘅人數只係佔大約一成一至一成三，真係唔知係吳克儉厚顏定容易滿足喇！
聽到佢嘅答覆，議員黃國健都忍唔住扯火，話唔明點解明明只有一成幾嘅學生修讀中史，當局都唔面對現實，仲大鬧「教育局呢班庸官根本係數典忘宗」，吳克儉淨係識誇誇其談咁話。
中史科排第八都受歡迎﹖大家唔好唔記得，被揶揄「唔得掂」嘅吳克儉喺十一個決策局局長中民望經常包尾，排第八對佢嚟講真係唔錯ｏ架喇！
