政壇：四叔真情剖白說平生

四叔尋日嘅講辭內容分咗六個部分，包括細說香江、財富「聚」「散」之道、澄清官商勾結及買股票好過買樓等，而最精彩嘅部分莫過於佢剖釋自己嘅五項佳績同被人誤解嘅事。佢話搵錢要成功，使錢都要成功，而自己做慈善就鍾意親力親為，出錢又出力。如果捐畀慈善機構，回報率只係一般，所以佢會以小博大。例如成立香港培華教育基金會，為國家培訓高級領導；推動農民、鄉村醫生嘅培訓項目等。

服務社會畀人笑

四叔仲話曾捐六億元人民幣畀內地三間頂尖大學、十億港元畀香港九間大學，做煤氣公司主席時，公司股價升四十倍等，就連集團收購舊樓重建嘅地盤都同市建局差唔多，即係香港其實多咗一間市建局，認真威水。

但四叔之後又回顧番被人誤解嘅六件事，包括仁安醫院事件，話政府喺八萬五時期急需用地，所以先將醫院餘地補地價嚟建屋，諗住可以增加庫房收益同房屋供應量，佢咁做仲畀朋友笑，但自己一心為社會服務而已。至於嘉亨灣及天匯事件，四叔就大叫冤枉，話嘉亨灣係依照建築法例去做，而天匯就真係有海外富豪以超價買樓，所以一切只屬誤會喎！

勸佔中勿過激

佢仲提到兒子搵代母生育，佢話「不孝有三，無後為大」，代母喺先進國家已成行成市，兒子只係盡孝道，香港唔可以墨守成規咁話。佢仲有提到「佔領中環」行動，話君子有三戒，其中一戒就係「及其壯也，血氣方剛，戒之在鬥」，所以奉勸時下青年人對佔中不可過激，要三思喎！簡直就係一本四叔嘅《我的一生》。