設計圖片及對白

觀塘區建制派為一億元地區重點項目爆發內訌!觀塘區議會地區重點項目工作小組尋日開會,原本有六個建議方案予小組討論,但會上因各種原因篩咗一個又一個方案,最後剩番由觀塘區議會主席Bunny陳振彬提出嘅方案「有得留低」,提倡3D音樂噴泉方案嘅建仔議員潘進源批評,Bunny有意留難佢提出嘅建議,甚至為坐落於自己選區嘅方案「度身訂造」出線,Bunny同潘進源為亮點工程「拗手瓜」之戰一觸即發。

設計圖片及對白

「不民主」捱轟

話說尋日觀塘區會地區重點項目工作小組舉行會議,有區議員會後爆料,身為小組主席嘅Bunny連番出招,疑似為自己同鄰區區議員馬軼超共同提出嘅觀塘瑞寧街樓梯通道興建升降機塔工程「護航」,消息指其中一個疑似被篩嘅方案係建仔潘進源提出嘅3D音樂噴泉。

綜合各方消息話,Bunny聽取議員意見後總結,指3D音樂噴泉方案要釐清維修保養事宜後先再決定有無得上會表決,潘進源事後批評Bunny做法「不民主」,一來佢提出嘅方案連保養費用,預計總開支為四、五千萬元,符合開支上限,二來佢曾諮詢大型顧問工程公司意見,認為3D音樂噴泉方案可行。佢自言︰「個個議員有思想,認為應由議員喺大會決定,而非主席決定係咪可行」。另有與會者亦質疑,Bunny提出嘅升降機方案可按政府部門恒常開支去做,唔見得呢個建議有乜特別亮點喎!

Bunny接受查詢時否認曾篩選任何方案,又話潘進源提出3D音樂噴泉方案,仍有待政府部門釐清部分問題,重申希望大家以和為貴解決問題,最終仍須於下星期二區會大會作最後決定,但佢同時希望挑選出亮點工程方案,最重要係得到政府部門支持。

第一手消息請下載on.cc東方互動iPhone/iPad/Android/Windows Phone Apps