奪命火原因不明 消防處戲夢人間

唔係講笑，今時今日，香港消防處真係糊裏糊塗乜都唔知o架。呢，大家記唔記得長沙灣工廠大廈火災，又記唔記得旺角花園街排檔大火？消防處事後敲鑼打鼓展開調查，結論千篇一律係「起火原因不明」。再睇土瓜灣馬頭圍道唐樓奪命大火，消防處最近向死因庭提交調查報告，五條人命亦係死得不明不白。死因裁判官陳碧橋火冒三丈，怒斥消防處嘅報告內容耳熟能詳，未打開已經知道會出現呢啲無結論嘅結論。

奇怪嘅係，其他政府部門又唔係咁睇喎，譬如花園街大火，機電署查到係電力問題。舊年六月屯門避風塘漁船大火，海事處亦查到係船上洗衣機故障起火。反而消防處查來查去得個吉，擺明係敷衍塞責啦，叮！

火災調查得過且過，白車服務亦唔好得去邊。前日之嘛，北大嶼山發生死傷枕藉嘅大車禍，因為區內救護車同人手嚴重不足，被迫拉雜成軍出動救人，滾水淥腳不知幾咁狼狽。最匪夷所思嘅係，最近車禍現場嗰間醫院叫做瑪嘉烈，但消防處唔知黐咗邊條筋，居然將重傷昏迷嘅巴士司機送去較遠嘅伊利沙伯醫院，結果，傷者搶救無效死亡。

講到呢度，或者你會問，既然消防處廢成咁，港府仲要佢哋來做乜？等太一叮話你知啦，消防處肩負不可告人嘅政治任務，已經變成箝制言論自由嘅現代東廠。早幾日之嘛，消防處聲稱收到一封電郵，投訴東方報業中心灑水系統有問題，短短四日已經踩上門「調查」，連查證投訴真偽嘅基本步驟都慳番，不知幾有「效率」。

即係咁，莊周夢蝶嘅故事係人都識，話說莊子某日夢見自己變成蝴蝶，一度以為蝴蝶先係自己嘅真正身份。家陣班消防高官一個二個發緊夢，發發下亦以為自己變咗政治打手，淨係識得打壓新聞自由，滋擾傳媒機構，完全唔識救火救人。好簡單，因為一心不能二用吖嘛！

消防不務正業，激起全城公憤，遭到社會各界異口同聲譴責。立法會議員黃毓民同梁國雄尋日聯署致函保安事務委員會，批評消防處做法極不透明，有欠程序公義且有濫權之嫌，要求喺會上安排議程，邀請消防處公開交代。不過可惜吖，你有你鬧，消防處處長陳楚鑫一於繼續戲夢人間。

太一叮思疑，家陣成個港府胡混度日，唔止消防處靈魂出竅，所有高官都已陷入昏迷狀態。若你問，點解政府民望連環插水，七一咁多市民上街？佢哋肯定會睡眼惺忪咁答，原因不明喎。叮！