政壇：搞搞政：民協人氣差 籌款無力

嘩！唔係呀？民協嘅KK馮檢基係立法會「超級區議會」議員，選舉時以排第三高票當選，又做咗議員咁多年，有一定知名度，竟然籌款額得咁少，街站拍烏蠅咁。所以話呢，市民眼睛雪亮，籌款成績一定程度上可反映政黨嘅人氣，睇嚟KK真係要檢討吓嘞！

再講，多個籌款街站以社民連嘅成績遙遙領先，籌得六十九萬元，比舊年嘅四十萬元有大幅增長。但吸金力強嘅立會議員黃毓民同人民力量分裂，令人力今年嘅籌款額大為縮水，由舊年七十萬元跌至今年約三十萬元，跌咗一半有多，人力前主席劉嘉鴻話雖然人力內部風波對籌款成績有啲影響，但都唔及落雨影響大。不過睇其他政黨嘅情況，佢嘅推斷又未必係全對囉。

新民主同盟今年大豐收，佢哋嘅議員范國威話籌得十一萬元，同舊年六萬元比簡直可以攞飛躍進步獎。佢話今次勝在產品夠多，雖然落雨搞到佢哋嘅佔中遊戲卡濕晒，損失咗一百套。