政壇：鼠王芬攞銀章忽然和善
「鼠王芬」梁美芬
向來有副戰鬥格嘅立法會議員「鼠王芬」梁美芬，隨時向泛民主派議員發動攻擊，但自佢獲頒銀紫荊星章，似乎對泛民和善咗。社民連副主席吳文遠爆料話，尋日同鼠王芬出席電台節目講政改時，原本預計會火花四濺，但赫然發現對方心情「不尋常地愉快」，事關平時駁嘴駁舌、對泛民起晒弶嘅鼠王芬，句句客氣又冇插嘴，打造咗個唔似鼠王芬嘅鼠王芬喎！驚訝「銀紫荊」果然犀利。莫非第時要改口叫鼠王芬做「銀鼠芬」？
「鼠王芬」梁美芬
有政界中人話鼠王芬做咗立會議員不足五年，就獲頒銀紫荊星章有啲意見。有人仲搵咗曾三度當選立法會議員嘅「阿王」王國興做例子，認為對方服務社會二十幾年，竟然僅獲得銅紫荊星章，認真係同人唔同命。
