美國中情局「走佬特工」斯諾登早前爆料揭發美國監控風波，現正尋求多個國家庇護，事件未平息，香港又發生有大貪官不尋常離港事件。講緊係捲入貪腐醜聞嘅「貪曾」前特首曾蔭權爵士，事關佢連特區政府每年一度喺回歸七一升旗禮同酒會都突然失蹤無出席，事後惹來各方非議。

貪曾有乜重要事情連七一升旗禮唔出席呢？向政界人士打聽，收到風貪曾喺七一前同人講，六月底會去加拿大探細佬，有人估計貪曾製造不在場證據係事出有因，因佢最近先後去過兩次酒會，包括係某左派報章同內地省市招商活動，有在場人士爆料話貪曾期間好無癮，又冇乜人同佢打招呼，有啲人見到佢就避得就避，貪曾十足過街老鼠，可能為免尷尬都係避席好過喇！

前任特首高級私人助理尋日回覆傳媒話，貪曾六月下旬離開香港，現時仍身在外地，離港前已通知民政事務總署並感謝邀請，又對未能出席升旗禮及酒會表示抱歉喎。所以話呢，早啲解釋咪好囉，搞到神神秘秘、鬼鬼祟祟為乜呢？難怪有政界中人講笑話，唔通貪曾突然離港係為免日後因為個人貪腐醜聞而「落鑊」，所以搵定加國庇護？

第一手消息請下載on.cc東方互動iPhone/iPad/Android/Windows Phone Apps