City Snapshot：靚太珍飾 姊妹愛戴
林黃寧艷（右）及鄧宣宏雁（左）被一件設計獨特嘅翡翠鑽飾吸引，中為劉黃寧達。
早前有日下晝約三點，見到靚太愛沙尼亞共和國駐港名譽領事林建康太太Lianne林黃寧艷、家姊Leta劉黃寧達同太子珠寶鐘錶執董鄧宣宏雁行出半島酒店，然後去咗彌敦道嘅太子店舖。原來Leta設計嘅首批翡翠鑽飾終於面世，鄧太特登喺黃金地段獨家銷售其大作，佢哋食完飯後去睇吓市況。
林黃寧艷（右）及鄧宣宏雁（左）被一件設計獨特嘅翡翠鑽飾吸引，中為劉黃寧達。
鄧宣宏雁（左起）、劉黃寧達同林黃寧艷，現身酒店商場閒逛。
林黃寧艷戴住嘅翡翠吊墜耳環，夠晒簡約別致。
有錢買唔到
優雅高貴嘅翡翠喺Leta大膽嘅設計下，充滿朝氣同型格。佢自爆喺世界鑽石切割中心比利時、百慕達前後住過八年，令佢愛上鑽石設計，仲學咗打金等工藝，後來逐一修讀鑽石珠寶相關嘅鑑定證書，終於成為專業人士。
Leta話首個系列歷經兩年時間設計，主題係大而誇張，啱晒追求自我風格嘅新時代女性。今年底將再接再厲，推出較小巧細緻嘅第二系列。
見Lianne當日戴住一對設計簡約嘅翡翠吊墜耳環，更見優雅氣質，原來係Leta專誠為佢度身訂造，真係有錢都買唔到。
暑假就到，Lianne話一家四口將搭郵輪暢遊愛沙尼亞、聖彼得堡及倫敦等，然後返老家星洲探親。
