政壇：搞搞政：鬍鬚曾講嘢唔知真定假
設計圖片及對白
點先睇到政治人物嘅真實性格？一定係聽其言、觀其行，而且最少睇成年先可作準。好似財爺鬍鬚曾咁，尋日被問到點睇現屆政府班子民望低迷，仲追問佢會唔會跳船辭職，點知佢答得好爽快，話自己愈做愈興奮！但事實係咪咁？從一年前佢嘅舉動已知。
設計圖片及對白
面對政府民望江河日下，鬍鬚曾仲鬼咁風騷，但江湖傳聞一年前嘅佢並唔係咁，原來一年前CY梁振英當選後，本來屬意愛將陳茂波做財爺，一來貪佢會計師出身數口精，二來貪佢係梁營撐自己人，「安全系數」甚高。
當時呢個傳聞喺官場快速傳播，好快就落入鬍鬚曾耳中，聽聞佢知道後意興闌珊，諗住索性退隱官場。由於佢一直住喺官邸，本港無任何物業在手，所以佢諗定後路，拿拿聲搵個地方落腳，等自己起碼有個竇口先。但佢點估都估唔到中央點名要佢留低，仲向CY傳令，唔准改變財金班底，鬍鬚曾最終順利「過渡」。
我哋睇番鬍鬚曾最近嘅利益申報，咁啱得咁蹺有個灣仔物業收緊租，唔知呢層樓係咪當日佢諗住用嚟自住嗰層？
舊年明明心灰意冷，搵定屋較腳走人，今年又話愈做愈興奮，到底鬍鬚曾講緊真心話，定係呃緊人？真係佢自己先知囉！
