政壇：張華峰肯捱 賺第一桶金
張華峰（左二）年紀輕輕就創業，原來係因為佢夠勤力乜都肯學。（受訪者提供）
身家豐厚嘅立法會金融服務界議員張華峰，喺網上分享佢十年內創業做老闆嘅往事。七十年代初，二十歲嘅佢加入一間證券行做證券交易員。當年佢日頭返證券行，放工幫人補習，夜晚仲會抽時間同屋企人穿膠花。死慳死抵捱足十年，本紅簿仔終於儲到六十幾萬元，羨煞唔少同行。
張華峰（左二）年紀輕輕就創業，原來係因為佢夠勤力乜都肯學。（受訪者提供）
雖然當時年紀輕輕嘅佢賺到第一桶金，但佢並冇攞呢筆錢買樓安居樂業，而係走咗去買證券行經營牌照，創立屬於自己嘅恒豐證券。佢建議年輕人唔好經常埋怨怕蝕底，反而要有敢於捱苦嘅心態，慢慢邊做邊學。
鍾意周圍「獵食」嘅峰爺仲有一句至理明言，就係無論經濟環境如何，佢仍然堅持要食得好。事關佢覺得品嘗美食除咗有效抵銷通脹外，經濟低迷時仲可以刺激市道，促進經濟復甦。雖然佢食嘢食到有個大肚腩，但完全冇唔開心，仲話大肚腩令人覺得佢分外親切可愛，令佢同其他人多咗話題。舊年立會選舉後佢成功減去三十磅，但佢話依家成日要開會睇文件，行山減肥等大計通通難以實行，睇嚟要減多三十磅真係遙遙無期。
