政壇：斯諾登匿港傳聞靠記者
美國中情局「走佬特工」斯諾登早前成功離港，唔少人都驚訝佢事前嘅保密工夫近乎完美，美國政府都冇佢符。有傳本港警方當時為斯諾登提供安全屋，但有指呢個講法只係吹水唔抹嘴。有保安局中人向我哋透露，斯諾登匿港期間最有可能住喺外國駐港記者嘅屋企。
住安全屋機會微
爆料人首先否定斯諾登入住安全屋嘅可能性，因為當事人入住嘅大前提係要先「繳械」，將電腦、電話等通訊器材通通交出，以避開勾線偷聽、監察或者跟蹤，保障當事人同執法人員嘅安全。而斯匿港期間就曾喺《衞報》記者協助下，同全球網民即時對話咗個幾鐘頭，冇繳過械就冇可能入住安全屋啦！
另外，有指斯諾登藏身外國駐港領事館，但斯諾登曾要求代表律師將手機放入雪櫃防止監聽，消息人士相信佢嘅藏身之所連夾萬都冇個，入住領事館機會都唔高。
咁斯諾登喺香港呢個彈丸之地走得去邊呢？爆料人引述早前消息，指斯諾登曾入住上環荷李活道附近，呢個講法似乎最合理，皆因荷李活道一帶鄰近蘇豪區同蘭桂坊，係外國駐港記者嘅熱門竇口。即係話，斯諾登逃港都要靠外部勢力支援嘅。
