南亞爆竊黨肆虐 皆因官僚門常開

顧名思義，南亞爆竊黨係指南亞裔人士聯群結隊入屋爆竊嘅犯罪兵團，近年肆虐新界，搞到居民人心惶惶。其中元朗八鄉係重災區，有失竊單位嘅閉路電視拍到，兩名懷疑南亞裔賊人唔使十五分鐘就將家中夾萬同三十萬元財物掠走，手法純熟，行動合拍，一睇就知經驗老到啦。其實，隔籬屋一年前亦曾被賊人潛入爆竊，從閉路電視所見，又係懷疑南亞爆竊黨所為，咁搞法，容乜易成個新界都淪為爆竊黨天堂o架！

添馬艦政府總部「門常開」改錯名，多次被盜賊光顧就話咎由自取啫，新界因乜事引狼入室呢？原來，近年新界西北區湧入大批南亞裔人士聚居，估計單係元朗八鄉已超過五千人，當中唔少更加係申請「酷刑聲請」或者持「行街紙」嘅所謂政治難民，因為工作受限制，經常無所事事周街遊蕩，令村民退避三舍。當然啦，你退避三舍啫，唔代表不法之徒會放過你間寒舍，警方資料顯示，元朗區拘捕嘅犯案非華裔人士激增，由一一年近三百人增至上年近四百人，包括普通盜竊、店舖盜竊及嚴重毆打等。

即係咁，香港人從來唔會戴有色眼鏡睇人，亦唔會種族歧視，南亞裔人士多數係奉公守法嘅良好市民，唔少人憑着個人努力改寫命運，喺香港創出一片天添。不過有一個事實係無可否認嘅，就係部分南亞裔人士作奸犯科，成為擾亂社會治安嘅計時炸彈，尤其係利用法例漏洞長期留港嘅所謂政治難民，三教九流，龍蛇混雜，有人做黑工，有人賣毒品，有人做睇場，有人淪為惡勢力外援軍團，打打殺殺，東躲西藏。呢，日前之嘛，一名富二代當街遇襲，八名涉嫌兇手中七人係南亞裔人，當中五人持行街紙。

講到呢度，大家可能想問，既然攞行街紙唔係行街，而係犯案，點解港府仲唔檢討相關政策呢？既然申請酷刑聲請唔係逃避酷刑，而係向人施刑，點解仲唔加強審查呢？美國走佬特工斯諾登喺香港申請政治庇護就話難搞啫，唔通港府對呢啲南亞裔嘅所謂政治難民都束手無策？嗱，呢個問題存在多年，再唔拆彈，香港遲早變難民港嘅咋！

才高招妒，門破招賊。講嚟講去，都係港產官僚呢班笨看更累事，面對難民不斷湧港，一味翹埋雙手瞌眼瞓，政策過時唔檢討，措施甩漏唔修補，闊佬懶理門常開，新界點可能唔淪為爆竊天堂吖？咁嘞，如果港產官僚繼續瞌眼瞓，唔做好呢份工，市民不如炒咗呢班笨看更先啦，叮！