行政會議成員羅范椒芬接受傳媒訪問，話梁振英競選特首時所提的政綱「十年都做唔晒」。

曾任梁振英競選辦主任（曾揚言不管梁先生當選與否，都唔會做政府官）的羅范，指政綱不能落實，全因目前香港政治氣氛差，無人願意加入「熱廚房」，佢直言曾搵到一個「人才」，欲拉與埋堆，但那「人才」說：「你不要找我，我家有僭建！」哦！請問那位「人才」高姓大名，住喺邊度！大家好想知喎！

梁振英的競選政綱，不能兌現，主要原因有三：

一、梁特首的親兵庸廢反智，形象恐怖，不得民心，加上醜聞不輟，淨係每日須解決自己新鮮出爐的「鑊氣」都未掂啦！仲如何得閒去「落實」主子對市民的「長遠承諾」吖？你死你事啦！

二、整個政府班子，由上至下，都各自為政，散亂不團結，搞到成個社會好似無王管咁！上層的頭頭明顯無能力駕馭和管治一個本來「和平理性非暴力」的良善社群，家陣，仲反而屈呢度係「一定不會和平」的「暴民社會」，真無能。

三、當時的競選政綱吹大咗。大佬！你哋乜都話得！托塔都應承，依家諸多藉口，推卸責任同拖延，仲信呢啲大話，就真係三世都返唔到家鄉呀！

最後，身為梁振英親信的羅范公然直指老細有嘢做咁掂，話十年做唔完，其實，背後潛台詞，即係叫阿公預留多屆時間畀佢哋處理後事咁解也！明未？女人街有件T恤，胸前寫着「信佢一成，雙目失明」，買件着上街吧！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東方互動iPhone/iPad/Android/Windows Phone Apps