設計圖片及對白

上屆區議會選舉,立法會議員「田二少」田北辰成功攻下荃灣愉景新城選區,雖然未知佢下屆係咪想連任,但已湧現新對手。曾幫佢打工嘅私人助理趙恩來,近月已披上工黨戰衣,下屆仲可能落區同佢對撼。如果真係成事,呢場倒戈之戰都好有睇頭,可以話係小員工火併大老闆嘅政治版。

設計圖片及對白

愉城選區本身係白鴿黨喺荃灣區嘅中產票倉,上次該黨王銳德輸咗畀田二少後,都似乎半放棄該區,但該黨仍想派其他人參選,唔想流失大批中產票源。不過,地區人士就發現趙恩來最近密密落荃灣區,仲經常出現喺愉城派單張,又擺檔接受街坊投訴,擺明向前老闆挑機。田二少回應話呢個世界自由競爭嘅,任何人有權利參選,佢亦唔怕有競爭,仲話愈多泛民主派出選愈好,等選民可以有多個選擇喎!

距離區選仲有好長時間,但增設堆填區就臨近埋身肉搏階段,田二少話已諗好堆填區點投票,只要政府承諾將所有垃圾車轉為密封式,垃圾運去轉運站後,再由海路運去堆填區,最後係採取防臭措施,如果三樣承諾都無問題,佢先會支持將軍澳堆填區,如果通過嘅話,佢就支持其他兩個堆填區,如果否決,其餘兩個就投反對票。

第一手消息請下載on.cc東方互動iPhone/iPad/Android/Windows Phone Apps