假公濟私讀法律 衞署變成律政司
本報早前踢爆衞生署助理署長蔡美儀獲豪批一年全薪假考大狀，唔使返工照逗人工，名副其實「假」公濟私。原來衞生署假公濟私嘅醜聞唔止咁少o架，除咗蔡美儀之外，仲有至少三名員工享受緊超筍待遇，獲全額學費資助讀法律。唔怪得有人懷疑，唔通衞生署想取代律政司？抑或想取代學生資助辦事處？
呢三名用公帑讀書嘅特權學生……唔係，係特權公僕至啱，包括一名藥劑師及兩名科學主任，自一○年開始修讀香港大學社會學系刑事司法課程，進修年期至一四年，以每年學費四萬二千元計，總共花費納稅人五十萬四千元。嗱，用納稅人錢供自己讀書，即係公帑私用，公私不分喇，咁仲唔係搵納稅人笨！
即係咁，公僕進修唔係話唔好，甚至係有必要添，與時並進吖嘛，之不過咁喎，進修始終係個人增值，學有所成係自己得益，點解要納稅人幫你哋交學費呢？如果個個公僕都話要用公帑進修，咁仲得了，納稅人多多錢都唔夠畀學費喇！
再講吖，正如立法會議員話齋，三人修讀嘅唔係法律學位，課程內容同衞生署嘅執法工作根本冇乜關係，話為公讀書純粹攞嚟講啫，為公帑讀書就真。正所謂食得唔好嘥，免費進修喎，邊個唔想呀？最令人質疑嘅係，衞生署咁多員工，偏偏係呢幾個人得到上司垂青，話唔係假公濟私明益自己友都無人信啦，叮！
邊個上司？咪就係前衞生署署長林秉恩囉。咪睇佢成日烏眉瞌睡咁款，益自己友不知幾眉精眼企。嗱，蔡美儀獲恩准放假一年白逗人工係佢退休前拍板嘅「臨別大禮」，三名特權公僕獲批准用公帑讀書又係佢任內嘅「恩惠」，攞公帑作人情，慷納稅人之慨，林秉恩簡直係人辦！
講開又講，林秉恩在任九年庸碌無為，醜聞多多，曾經因為監管不力，搞到「發霉藥」害死病人，會唔會佢自己都係受害者，食錯發霉藥，渾渾噩噩，搞到成個衞生署綱紀敗壞，日漸發霉呢？其實，衞生署嘅混帳唔止咁少，前副署長譚麗芬亦被踢爆曾帶薪到新加坡進修，被質疑濫用公帑。
咁講啦，經過林秉恩九年禍害，衞生署唔止就快變成律政司同學生資助處，更加變成蟲鼠組添，唔該現任衞生署署長陳漢儀快快消毒除蟲，掃除不良歪風，掃走烏煙瘴氣，如果唔係，你哋唔使進修法律嘞，進修調理農務系啦，衞生署遲早取代埋漁護署嘅咋，叮！
