政壇：搞搞政：高佬賢狂開議辦燒銀紙
設計圖片及對白
立法會漁農界一向係投團體或組織票，所以界別入面好多人都無份投票，但漁農界議員「高佬賢」何俊賢卻先後喺元朗、西貢同金鐘立會開設議員辦事處（議辦），連同最新物色嘅大埔議辦，至今總共有四個議辦，數目之多，分分鐘拍得住啲超級區議會界別議員，莫非佢有意鋪路下屆參選超級議員？
設計圖片及對白
高佬賢笑言冇能力選超級議員，又話撇除金鐘立會議辦，其餘三個議辦分布似三角形，主要係方便漁民有需要時搵佢幫手︰「無理由叫西貢附近嘅漁民搭巴士入大埔搵我，所以都要同人夾份喺西貢開番個議辦。」
香港仔係另一個漁民集中地，會唔會喺港島開多個議辦？佢話凡事都要循序漸進，又笑言一年開三個議辦已經好急進，負擔都唔少，依家淨係每月租金總共都要三萬元，仲未計議辦嘅裝修同人工等開支，就算有實報實銷開支都要自己「科水」補貼喎！不過，俗語話「冇咁大個頭，就唔好戴咁大頂帽」，如果搞到議辦執笠就唔好啦！
