政壇：劉嘉鴻突辭人力主席位

劉嗡撰文認同真普聯方案，促使毓民喺網上電台公開批評劉嗡行為完全背棄人力政綱，更加話同佢「道不同不相為謀」，要求佢引咎下台辭去主席一職。毓民一星期後宣布退出人力立法會黨團、人力執行委員會及民主倒梁力量，雖然人力執委發表公開信挽留佢，但佢仍不為所動，仲話彼此已係陌路人，邊個接受挽留嘅就唔係人喎！為令事件告一段落，劉嗡尋日係人力執委會上宣布辭去主席職務，理由係希望執委公平考慮毓民要求佢落台係咪合理。毓民就話自己已退出人力，唔會評論劉嗡辭職一事，至於會唔會重返人力，佢就用「絕無可能」嚟回應。