政壇：Greg蘇講電腦九唔搭八
設計圖片及對白
美國中央情報局前特工斯諾登爆料事件引起社會對香港網絡安全問題嘅關注，議員馬逢國尋日喺立法會就此提出緊急質詢。保安局局長黎棟國就講咗一系列阿媽係女人嘅措施，搞到都算係IT人嘅議員「樹根」鍾樹根都忍唔住窒佢，而商務及經濟發展局局長Greg蘇錦樑仲出嚟幫拖，點知原來佢嗰招竟然係「九唔搭八」。
設計圖片及對白
對於議員有關美國引渡斯諾登嘅問題，黎棟國一概「以唔方便披露行動細節」為由拒絕回答。既然佢唔講引渡，咁大家就諗住叫佢講解下當局點樣確保資訊保安唔受威脅啦，點知佢就講咗一系列阿媽係女人嘅措施，話政府各決策局部門會安裝防火牆同防禦病毒軟件、定時更新軟件系統、同埋會喺儲存同傳送機密資料時加密咁話。
大家聽落係咪覺得熟口熟面，同自己屋企做開嘅嘢差唔多呢？就連樹根都忍唔住話政府啲措施「同屋企做嘅一模一樣」，仲問「除咗一般家庭用嘅措施，有冇政府級數嘅去防止入侵、電腦被盜用嘅方法呢？」暗寸黎棟國講嘅措施低層次。
議員嘩聲四起
呢個時候Greg蘇就彈起身幫拖，佢同樹根都係建仔成員，當大家諗住睇下佢哋點交手嘅時候，點知Greg蘇就施展一招「九唔搭八」，話社會各界嘅電腦使用者要做好防備工作，又話最重要都係電腦使用者自己要增加電腦知識，先可解決防禦問題。
大家聽完Greg蘇咁講之後即刻嘩聲四起，睇怕係畀佢九唔搭八嘅回應嚇親。
