膠袋稅唔湯唔水 廢膠量不減反增

即係咁，一項愚蠢嘅政策，必然得出愚蠢嘅結果，大家不妨睇吓港府寓禁於徵嘅「成果」先。膠袋業界早前公布調查結果，雖然要徵費嘅穿孔膠袋用量下跌兩成，但其他膠袋用量大幅上升，當中不織布袋同垃圾袋分別增加九成六同六成三，令整體塑膠原料使用量增加兩成七。即係話，膠袋稅推行將近四年，香港廢膠總量不減反增，不僅無助環保，反而傷害地球，真係膠到冇朋友，膠到你唔信。

不過，港產官僚自我感覺良好，準備大幅擴張徵稅範圍，由目前三千家大型連鎖店推廣到全港六萬家零售商。唔同嘅係，以前嘅膠袋稅要上繳，每年二億元徵費盡入庫房，家陣港府皇恩浩蕩，計劃同全港商戶「分膠同味」，大家收到嘅錢可以自己袋埋，唔使上繳咁話。

膠袋稅唔使上繳，新政策膠上加膠。立法會草案委員會尋日審議擴大膠袋稅，出席團體同議員紛紛質疑新政策唔湯唔水，好難監管，商家為咗牟利，可能會迫使消費者多用膠袋，或者以免徵費作招徠吸引顧客，無論出現邊種情況，都會違反減廢環保嘅初衷。一句講晒，減廢成效值得懷疑，行政成本高於一切，新安排根本就無助環保。

至於有人建議港府實行雙軌制，要求營業額大嘅連鎖店照舊上繳徵費。環保署官員連連耍手擰頭，話呢種做法會違反法律面前、人人平等嘅精神喎。

叮你個鎯鎯呀，逢人都話官僚不食人間煙火，脫離現實，真係一啲都冇講錯！試問世上邊有絕對公平呢回事o架？根據官僚邏輯推論落去，港府向七十歲以上長者發放生活津貼，就係對七十歲以下市民不公，立例向公司買樓徵收重稅，好明顯亦係違反法律平等精神啦！

其實，要講不公稅項，按量收費嘅膠袋稅就係最唔公平嘅，事關佢對基層市民造成最大影響。攞前特首曾蔭權爵士做個例子，佢任內經常濫用公家提供嘅專車買嘢，可以唔用膠袋，連五毫子都慳盡；反而無車代步嘅基層市民買嘢就要焗畀膠袋稅，有咩公平可言？再講吖，香港環保政策同錢掛鈎，由排污費到膠袋稅，由電器回收費到垃圾費，不斷打小市民荷包主意，反而富到流油嘅港府一毛不拔，你話又公唔公平呢！

唉，推動環保寸步難，港產官僚只愛膠。太一叮忠告港府官員，腳踏實地除廢減排，速速喚回藍天白雲，做氣候逃犯固然唔啱，一味打膠主意亦係冇用o架，叮！