政壇：政商定格：肥亨傳任港鐵董事
傳聞政府會提名馬時亨做港鐵董事。
曾任財經事務及庫務局局長、商務及經濟發展局局長嘅「肥亨」馬時亨，自從退出官場後就甚少擔任公職，但尋日就有報道話政府會提名佢做港鐵董事，仲話委任佢做董事只係第一波，最終目的係鋪路接替錢果豐做港鐵主席。不過，做主席呢個講法咁長遠，到時係咪佢做根本冇人知。
傳聞政府會提名馬時亨做港鐵董事。
錢果豐嘅任期去到一五年屆滿，屆時佢就做咗十二年主席，夠晒鐘換人。有傳話政府已有心水人選，但唔可以到臨任期滿先委任，決定先安插心水人選做住港鐵董事，等佢慢慢摸熟內部運作，再接錢果豐個位。政府會喺月底舉行嘅港鐵董事局會議中，提名三人做新任港鐵董事，除肥亨外，仲包括消委會前總幹事陳黃穗同運輸署前副署長陳阮德徽。港鐵主席對肥亨嚟講應該無乜難度。有講法話，依家只係提名階段就爆出消息，相信有人想相關人士「見光死」。我哋曾聯絡過肥亨，佢話不予置評。
