政壇：搞搞政：建仔變相老人治黨
設計圖片及對白
近年經常為參選出現人事內訌嘅建仔，雖然有唔少年輕人冒起，但依然上位無望。佢哋依家有十三個立法會議員，如果現任議員全部喺一六年立會選舉連任，當中有五人參選時將年屆六十五歲或以上，包括葉國謙、「象哥」黃定光、「譚Sir」譚耀宗、「橄欖」陳鑑林同創黨主席曾鈺成，而且譚Sir仲兼主席，名副其實係老人治黨。
設計圖片及對白
事實上，曾鈺成日前突自爆有意徹底「裸退」，即唔再參選下屆立會同特首選舉，加上譚Sir今年四月黨內換屆時，公開同私底下都曾講過唔想連任黨主席，有黨內中人都估計事非尋常，相信係為將來退下火線做準備。之不過，橄欖、象哥同阿謙何去何從就變數多多，其中橄欖同象哥自○八年已「放風」有意退下火線，但○八年同一二年兩屆選舉仍然未退。
另外，黨內時有聲音要求阿謙退位畀新人上位，睇得出建仔求變呼聲日益壯大，究竟「舊人退，新人上」會否再次淪為「空口號」，部分人會否再次因等了又等而對黨表示不滿，甚至爆內訌同衝突，咁建仔就要好自為之喇！
