政壇：打工皇帝薪酬成秘密
新稅務局局長黃權輝明日上任。
稅務局每年都會公布十大繳交最高稅款嘅資料，畀各大媒體玩吓遊戲，估計邊個係該年度交稅最多嘅打工皇帝。不過，由今年起，打工皇帝嘅收入將永遠成秘密，因為稅務局唔會再公布有關資料，以免造成不必要嘅猜測。咁究竟係咪有「打工皇帝」向稅務局投訴呢？稅務局回應話：「唔係！」但就補充多句，即使傳媒入紙查詢，都唔會再提供相關資料。
新稅務局局長黃權輝明日上任。
如果唔係有「打工皇帝」投訴，有人就猜測係咪稅務局近期忙於處理徵收額外印花稅、逃稅個案、甚至應付有人發起喺第二期稅少交十元嘅行動，因而令工作量大增，所以要減少啲工作呢？抑或係唔想塑造咁多打工皇帝出嚟，避免社會仇富？
無論上述揣測係真係假，其實稅務局真係好忙o架，點解？事關新稅務局局長黃權輝明日上任，我哋想約佢做訪問，點知稅務局都話唔得，仲話喺明年五月一年一度嘅稅務局記者會先同局長見面喎。大家冇聽錯，係明年五月先見大家。
老實講，呢個政府「熱廚房」咁熱，明年見唔見到局長都好難講呀！
