政壇：曹崇恩為生命鬥士塑像
曹崇恩（左圖）巧手為力克胡哲塑像，栩栩如生。（受訪者提供）
天生冇咗四肢嘅國際生命鬥士力克胡哲（Nick Vujicic）魅力沒法擋，本月初訪港時吸引眾多粉絲一睹其風采。原來著名內地雕塑家曹崇恩都係佢粉絲，當日專程由廣州來港見偶像一面，返家後即急不及待動手為對方製造雕塑，現時雕塑放喺廣州曹崇恩雕塑園，供大眾觀賞。
曹崇恩（左圖）巧手為力克胡哲塑像，栩栩如生。（受訪者提供）
曹崇恩嘅雕塑作品遍布中港，唔少政商名人都鍾意搵佢造個人塑像，尖沙咀星光大道嘅李小龍塑像，都係出自佢一雙巧手。今次曹崇恩自動請纓為Nick塑像，源自佢年前讀過對方嘅數本著作後，被對方堅強嘅意志深深吸引住，仲封對方為偶像。早前Nick到訪澳門，曹崇恩不顧八十歲高齡到澳門「追星」，可惜與偶像擦身而過。
但佢並冇因此灰心，再接再厲追到嚟香港，終於畀佢一睹偶像風采，並以多角度攝下對方演講嘅神態，為製造塑像作參考之用。曹崇恩話，好欣賞對方「身殘志不殘」嘅自強不息精神。佢認為Nick冇四肢都可以創造輝煌人生，所以想藉雕塑激勵大家發奮向上。
