政壇：發叔「降呢」擦盆菜
設計圖片及對白
沙田石門新界鄉議局新大樓，早前因為籌建多年，建築費已由幾千萬超支到近二億元，而喺新大樓啟用期間，被發現內部多處甩漏，又要繼續為大樓嘅營運同工程費而頭痕，借落一筆街數不特已，仲搞到頻頻收律師信添。所以鄉議局主席劉皇發同副主席張學明由舊年十二月開始，就四出撲水，又落鄉、又訓話，總之乜招都出齊。不過，事情至最近終於有轉機，事關鄉議局尋日舉行嘅執委會會議，正式公布九龍塘舊址經已以一億七千八百萬元賣出。聽聞，呢筆錢除可清還新大樓嘅工程費之外，仲有錢剩嚟投資添。唔知係咪呢個原因，鄉議局尋日喺執行委員會會議結束後，搞咗個盆菜宴，喺會議廳旁邊嘅會議室開咗六圍，話係畀機會各鄉事委員會主席同傳媒交流，以後仲會定期搞添！
設計圖片及對白
以前飲開法國名酒
話雖如此，但呢頭賣咗舊址，嗰頭就搞盆菜宴，係咪因為賣咗家當先有錢呀？手執紅酒嘅發叔就話，一圍盆菜都唔係好貴啫，鄉議局點都夠錢畀。而且，以前鄉議局仲喺九龍塘嘅時候，定期搞嘅聚會仲貴啦，嗰時會開法國名酒Lafite飲添。咁佢飲緊嗰杯係咪Lafite嚟o架？佢就話依家買嘅只係普通紅酒。
雖然有關方面話呢次盆菜宴係畀各鄉事委員會主席同傳媒交流，且以後每月執委會會議後都會舉行一次，但按照我哋嘅統計，似乎大部分鄉委會主席都以為係為變賣九龍塘舊址而慶祝喎！
