醫生偷懶又偷藥 公共醫療病纏身

呢名杏林家賊係醫管局粉嶺家庭醫學中心高級醫生岑文慰，職位雖然高級，但欺詐手法就相當低級，七年內多次假借病人名義製造虛假預約診症，從而為自己騰出空檔吞泡蛇王，又發出虛假藥單呃中心藥房配藥，靜雞雞私吞三十八項藥物。呢名醫盜被控欺詐及盜竊等二十二項罪名，尋日被法院判入獄九個月。

唉，待遇優渥嘅高級醫生居然淪為雞鳴狗盜嘅竊藥聖手，既令人嘆息，又令人憤怒。公營醫院紀律廢弛，醫生上班唔係盡心盡力為病人診症，而係殫思竭慮為自己搵着數，根本無認認真真做事，唔怪得醫療事故長爆長有啦！

叮佢個鎯鎯，公營醫院亂象叢生，家陣唔止醫療事故層出不同，連醫生醜聞亦五花八門，咁仲唔係百病纏身？咁講啦，公家醫生之所以紛紛萌生貪念以公肥私，除咗出於人心不足，更加因為監管不足。正所謂蒼蠅不叮無縫的蛋，如果在上之人監管嚴格，紀律嚴明，下面嘅人就算有幾大貪念都唔敢亂嚟啦，係咪？

好似嗰筆白逗人工大混帳咁吖，衞生署居然批准助理署長蔡美儀帶薪放假一年讀書，白白將一百六十萬元公帑送畀一個無返工嘅人，話衞生署無病都無人信啦。呃藥係盜竊，其實巧立名目放假照支全薪一樣係呃納稅人錢o架咋，兩者性質無乜分別。

由此可見，本港公共醫療系統已經爛到入心，內部管治烏煙瘴氣兼夾烏厘單刀。最激到人啤一聲嘅係，醫管局又好，衞生署又好，次次爆出醜聞之後當局都話會檢討同跟進，結果次次都係虛擬診症，自欺欺人。喂，欺詐公帑雖然缺德，但係謀財始終唔會害命，醫療高官怠工影響整個醫療系統服務質素，好容易害死病人o架！

講開又講，醫衞部門醜聞無奇不有，早前又係有高級醫生被踢爆呃呃騙騙，未經批准秘撈教授品酒課程，唔該食衞局局長高永文一併為衞生署把脈搵出病源。如果唔係，醫生公僕個個變晒貪財小人，唔係呃藥呃錢就係呃部門，盞敗壞杏林名聲o架咋。

一句講晒，有病就食藥，有問題就根治。貪心就話無藥醫啫，公共醫療系統要醫嘅話一定有辦法，除非主診嗰個自認庸醫啦，咁就例外。