香港無綫電視台繼去年出賣一班命苦剩女的「私隱」後，今期，輪到叫人嘔吐的「K型男」。

大人大姐，有思想有羞恥心的雄性動物，總不會當着幾百萬人面前騎呢反智，任電視台魚肉，丟人現眼，給自己一個終生烙印，猶如面上刺青，成世洗不掉、擦不清的疤痕！

幸好，上述那棚「型男」，投身的，是個醉生夢死的殘酷低智娛樂圈，裏面，沒有對錯，也無黑白，只有跟紅頂白、世態炎涼。

娛樂行業，最怕無noise，無人提就死得的了！

無綫是娛樂大阿哥，深諳「成功之道」，在一個反智年代，要搞Talk of the town，真係話都無咁易，其中唯一的問題，只是有無人願意「為藝術犧牲」而已！

無綫收視高，是那些「唔入流」的茄喱啡博出位的首選平台，所以，尋找「世外極品」，一點難度也沒有。

喺香港娛樂圈（甚至大中華），只要有知名度，就算係臭名污名，當一舉成名，錢財和機會便會滾滾來。嗱！有個以「警鐘胸」自豪的老模，即使被人將露毛淫照鋪上網，避走外地一輪，返來仲紅過以前，更多撈咗！另一個偷拍與Chok王同床共枕的二打六大陸妹，家吓紅爆大中華；還有一件未夠秤的學生妹，話同Edison親密合照嘅手機唔見咗，現已做咗「歌星」，經常「高薪」返大陸接Job！

現實就係咁o架啦！誰會記掛「道德」二字。

無綫是個商業機構，以「股東」利益行先，搞噱頭、搶收視為首要任務，那些不男不女的妖怪，只是互相利用的買賣，對社會意識的破壞？法律顧問話無違法便是了！你大可以唔睇嘅！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps