設計圖片

過去咁多年,建制派都喺七一上晝搞匯演,下晝泛民就搞遊行,大家河水不犯井水。今年建制派特別進取,香港各界慶典委員會尋日宣布,首度唔再喺上晝搞大匯演,改為下晝喺添馬公園搞活動啟動禮,擺明同七一遊行打對台。而工商聯仲搵咗百幾間商戶,大部分喺當日下晝兩點至五點提供折扣優惠,唔通諗住吸引啲市民去shopping,就可以少啲人去遊行?

設計圖片

對於活動啟動禮擺明同遊行打對台呢個講法,各界慶典委員會主席鄭耀棠就話因添馬公園喺正七一至交場,搭台搭得嚟都下晝喇!真係信不信由你。

我哋上網睇過張商舖優惠清單,喺有一百六十間店舖當中,有八十二間係龜苓膏專門店,仲有幾間酒樓講明下午茶五折優惠。有專賣瓜子嘅店舖就提供瓜子、花生五折,但限定兩點至五點,仲有十間店舖提供買二手名牌手袋優惠,但最估你唔到,係北角一間地產代理講明七一當日買樓免佣添!

之不過,聽聞唔少零售界人士都覺得今次行動政治味道太重,擔心會有反效果,所以好多出名連鎖店都無加入今次大特賣行動。建制派算到咁盡,但似乎仲未明白一個道理,就係「唔怕神一樣嘅對手,只怕豬一樣嘅隊友」,呢次騎呢大特賣究竟係倒米定幫手?

此外,七一有石崗、新圍同昂船洲三個解放軍軍營開放,市民可以喺嚟緊星期日上午八點半至十二點半,喺六個地點攞門券。

第一手消息請下載on.cc東方互動iPhone/iPad/Android/Windows Phone Apps