貪曾坐喺台上無人理,認真冇癮。

「貪曾」前特首曾蔭權爵士好耐無蒲頭,尋日有個左派組織舉行周年晚宴,貪曾可能見有着數,所以現身獻世。不過佢本來應承主辦單位食埋飯先走人,但佢又突然改變主意,搞到主辦單位失晒預算,既要臨時臨急抽起佢喺筵席上嘅名牌,又要安排其他人坐佢個位,貪曾今次有飯都唔食,一定有好充分嘅理由,其實咪就係因佢喺現場備受冷落,頂唔順要走先囉。

貪曾坐喺台上無人理,認真冇癮。

貪曾難得出席公開場合,傳媒當然好多嘢要問佢啦,大家最關心莫過於廉署有冇搵佢協助調查,但佢依然闊佬懶理,皮笑肉不笑咁就入咗會場。到主人家頒獎時,貪曾好無禮貌,坐喺台上一味掛住篤自己部手機,完全唔將主人家放在眼內。

到其他人致詞時,貪曾又「木嘴」示人,但一到影合照時刻,就即時變臉笑笑口,演技一流。由於佢唔畀面人,人哋當然都唔畀面佢啦,當大家祝酒時,企喺最前排嘅貪曾就無人騷佢,台上幾十人得兩三人行去同佢碰杯,佢亦好無癮,惟有當手上香檳係茅台一飲而盡,最尾仲要唔通知主辦單位下鬼祟離開,仲點食得落飯?

第一手消息請下載on.cc東方互動iPhone/iPad/Android/Windows Phone Apps