政壇：黃國健狼叫鈴聲嚇人
設計圖片及對白
咪以為午夜凶鈴先恐怖，原來日間凶鈴都嚇破膽o架！日光日白都嚇破膽？唔係誇張，係真有其事。
設計圖片及對白
活動期間出醜
其實唔少人都選用自己喜歡嘅歌曲做手機鈴聲，不過立法會九龍東議員KK黃國健就揀咗與別不同嘅手機鈴聲。日前佢以嘉賓身份出席一個活動時，唔記得將手機轉做靜音模式，就喺儀式進行期間，佢袋喺西裝褸嘅手機忽然響起「呀嗚」一聲清脆嘅狼叫聲，當堂嚇親身邊嘅人，連佢自己都有啲唔好意思，拿拿聲拎部電話出嚟熄咗佢。
點解揀啲咁嚇人嘅鈴聲？KK事後解釋，用狼叫做鈴聲係有原因嘅，係因為佢嘅聽覺不嬲都唔多敏銳，曾經用過英文歌同純音樂做鈴聲，都嫌旋律太過柔和，搞到好多時手機響咗好耐，佢都聽唔到，錯過咗唔少重要嘅來電。雖然佢嘅手機有秘書台服務，嚟唔切接聽嘅電話會自動飛線過去，但成日唔接聽電話，感覺上始終唔多好喎！
KK於是搜尋手機嘅內置鈴聲，揀嚟揀去，最後選咗最能夠警醒佢嘅狼叫聲，自此以後再冇聽唔到電話響，除咗喺議會進行期間，先至轉用靜音模式。咁梗係，咁嚇人嘅鈴聲都聽唔到嘅話，睇怕佢要去檢查吓對耳仔係咪有啲問題喇！
不過，亦由於狼叫鈴聲好響亮，佢經常都畀人投訴個鈴聲嚇破膽，所以佢話遲吓都打算轉鈴聲，不過仲未諗到轉乜聲好喎。唔知佢會唔會考慮轉用立法會召集議員返回會議廳嘅鐘聲呢？
