老鼠結隊迎賓 郵輪碼頭招嚇

啟德「米奇樂園」佔地廣闊，橫跨郵輪碼頭大樓同第二個泊位一帶。上星期三米奇樂園開張……唔係，係郵輪碼頭開張時，本報記者已經喺第二泊位驚見鼠輩蹤迹。到前晚同尋日再三實地視察，嘩，唔睇猶自可，一睇嚇到傻，啲老鼠又大隻又生猛，至少有成二、三十隻，連群結隊，四出搵食，簡直當正碼頭係樂園呀！

有無搞錯呀？郵輪碼頭變咗老鼠蹂躪碼頭，用咁嘅「招嚇」手法迎賓，唔趕走晒啲客人都失禮死人啦。口岸係一個城市嘅門戶，客人一入門口就見鼠輩通屋走，你估對香港形象有乜影響呢？你估遊客仲有無意欲再嚟呢？豪華郵輪旅客好多都係高貴闊太同銀髮一族，萬一一落船就畀鼠輩嚇到花容失色，香港旅遊業必然隨之黯然失色o架。

耗資逾八十億元興建嘅旅遊新地標點解會淪為老鼠樂園呢？嗱，喺第二泊位工作嘅周先生係咁講嘅，鼠患早喺碼頭工程動工不久已經出現，懷疑因工友將食剩飯盒隨處擺放所致，承辦商喺碼頭開幕前曾經滅鼠，可惜情況改善不大。有碼頭大樓工友亦話，一樓同三樓鼠輩橫行，「有啲大到好似隻貓咁」，尤其鍾意匿藏草叢，原因可能係「垃圾多又唔衞生」！

大家明啦，垃圾多，衞生差，老鼠唔客似雲來就奇啦。碼頭天花板漏水可以賴黃色暴雨，旅客大排長龍等唔到的士可以賴同業界溝通不足，環境衞生惡劣搞到鼠禍處處又賴乜嘢呀？賴管理人員太多垃圾呀？叮!

都唔知搞乜嘅，香港難得等到一個大型旅遊設施投入運作，居然搞到天花滲漏，交通甩漏，老鼠橫行，郵輪碼頭究竟係招客定趕客？咪嘞，官老爺話研究安排穿梭巴士，接送碼頭旅客去女人街同山頂等景點喎，唔該今次思慮周詳啲，最好安排一條最近醫院路線，萬一有旅客被老鼠嚇暈咗，都有最貼身嘅補鑊服務吖嘛。

唯一值得慶幸嘅係，下一艘郵輪泊岸係十月份嘅事，家陣補鑊仲或者嚟得切，快啲消除鼠患，打掃門庭迎接下一批客人啦。嗱嗱嗱，唔好以為船到橋頭自然直，啲老鼠會自動消失呀，如果下次郵輪靠岸時碼頭上面萬頭攢動嘅唔係旅客，而係老鼠，咁就唔該港產官僚同鼠輩一齊消失，叮！