唉呀！最近，真係有點弊傢伙，唔知使唔使要去睇醫生，仲唔係醫傷風感冒嗰隻，而係精神病專科呀！

何解咁嚴重？因為，近來，每朝翻開報紙，居然會一邊睇，一邊搖頭，仲有呀！唔只搖頭，還會「嘆氣」，有時，外表看不出的，「心在淌血」呢！你哋話嚴唔嚴重吖？

就尋日之嘛！本報要聞，雞乸咁大隻字嘅標題：「林建岳剷平薛覺先故居」。

林建岳乃本港旅遊發展局主席，理應對「景點」、「文物」及「古蹟」有一定的愛護心啩！佢旗下的地產公司在廣州半夜施工，將薛覺先故居拆個稀巴爛。

香港新一代不識薛覺先。佢係上世紀粵劇界頂級泰斗，其故居更是「民國時期」樓房，絕具「歷史價值」，更是當地老街坊的「集體回憶」和「文物保護重點」！

睇到呢則新聞，已經自動搖緊頭之際，再揭開內地報章，又見標題大字：「廣州地鐵施工，一夜挖掉五座先秦古墓」。

「昨天還在這裏進行考古挖掘，今早……」又係漏夜鬼祟動工。施工公司話「可能工人對考古範圍弄不清所致。」地鐵公司卻說：「施工已得到考古所同意。」吓！而考古所答：「通知可以來施工？不可能！」係咪一路睇呢的新聞，一邊會心絞痛吖？

一個怕人民追溯歷史的政權；怕歷史建築物留存「證據」、「回憶」和「情感」；怕人民知道真相；怕人民以古鑑今；怕人民追問過去……所以，廢除學校歷史科也不夠，使橫手「毀屍滅迹」，而且，重重有賞添！

唉！使唔使睇醫生呢？你哋話！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps