政壇：政商定格：袁彌明侯志強唔撐住家男
原來袁彌明（右）同侯志強嘅思想一樣咁傳統。
雖然人民力量Erica袁彌明，同上水鄉事委員會主席侯志強嘅性格同背景南轅北轍，但原來佢哋都有共通之處。佢哋尋日出席電視台父親節節目時，高唱大男人萬歲之餘，仲話男女永遠都唔可以平等，唔接受男人長期「零生產力」留喺屋企做住家男人。
原來袁彌明（右）同侯志強嘅思想一樣咁傳統。
蜜運中嘅Erica話中國社會普遍認為男人應有事業識搵錢，又透露自己較為傳統，覺得男人始終係一家之主，理應出去返工搵錢擔起成頭家，而唔係留喺屋企做家務。佢話將來結婚後，一定唔會接受老公喺屋企全職湊仔、唔出去做嘢，兼攤大手板問佢攞錢。
大男人主義爆燈嘅侯志強有三個仔女，佢不斷強調男人湊仔會惹來他人奇異目光，又話兩性角色由古至今都係「男主外，女主內」，爸爸理應冇乜時間接觸仔女，但仔女有事必然會搵爸爸出頭，而唔係日日喺屋企出現嘅媽媽。佢嘅仔女已長大出嚟社會做事，唔知佢哋細個嘅時候有幾多次有事搵爸爸出頭呢？
