政壇：搞搞政：貪曾呃掌聲基建樣樣煩
設計圖片及對白
上星期講過「貪曾」前特首曾蔭權爵士落任前，答應建萬五間公屋，搞到現屆政府依家都仲未能落實佢開嘅空頭支票。其實好大喜功、鍾意搞大白象工程嘅貪曾喺○七年宣布興建十大基建，以為開出期票呃掌聲，就可幫佢爭取連任，原來財經事務及庫務科當年都勸佢唔好做，認為呢啲工程極不實際，同一時間興建十大基建，將會大大推高工程嘅建築成本，建造業人手亦會突然短缺，而且年期長嘅工程一定受通脹影響而嚴重超支，可惜煲呔曾全部聽唔入耳，堅持拍板興建。
設計圖片及對白
過咗近六年，最好嘅算係南港島線東段，預計一五年竣工，其餘九大工程就慘囉，沙中線一拖再拖，令造價由當初三百幾億元急升至最少八百億元埋單，最快要一八年至完工。屯門西繞道同屯門至機場連接路，到依家都只做緊工地勘察；廣深港高鐵因施工緩慢，被承建商索償幾十億元，西九文化區未起已傳聞超支二百億元，要周圍諗辦法撲水。港珠澳大橋就漏做環評報告被司法覆核，拖慢工程進度。
例如落馬洲河套區同港深機場鐵路，今時今日只係空中樓閣。新市鎮發展亦因新界東北爭議被叫停。有啲基建甚至鬼祟縮水，好似啟德發展計劃，現時只搞掂郵輪碼頭，但啟德體育城，都仲係紙上談兵。空有構想而執行能力不足，咁同發夢有乜分別？
